Карбамид: ауыл шаруашылығындағы қауіпсіз әрі тиімді таңдау

Тыңайтқышты таңдау – бұл тек өнімділікті арттыру емес, сонымен қатар топырақтың саулығы мен өнім сапасына қамқорлық. Аммиак селитрасын қолданғанда өсімдіктің өсуінің соңғы cатысында нитраттар жиналуы мүмкін, бұл кейіннен өнім сапасына кері әсер етеді. Осы тұрғыдан алғанда, карбамидтің айтарлықтай артықшылығы бар.

«Карбамидтің аммиак селитрасына қарағанда өсімдіктің сапасына тигізер зияны аз, өйткені селитраны қолданғанда өсімдік пісуге жақындағанда құрамына нитраттар жиналуы мүмкін. Ал карбамид құрамындағы азот өсімдікке біртіндеп сіңіріледі, бұл нитраттың жиналу ықтималдығын азайтады. Яғни, азотты карбамид тыңайтқышының ауыл шаруашылығы үшін, жалпы алғанда қаупі аз деуге болады», - дейді ауыл шаруашылығы ғылымдарының докторы, профессор, ҚазЕжӨШЗҒЗИ Егіншілік бөлімінің бас ғылыми қызметкері Жұмағали Оспанбаев.

Сонымен қатар, аммоний нитраттарының жылжымалылығы жоғары екенін ескерген жөн -олар жауын-шашынды кезеңде немесе қар еріген кезде тез арада топырақтың төменгі қабаттарына шайылып кетеді. Бұл тек тыңайтқыштың тиімділігін азайтып қана қоймай, топырақты ластауы мүмкін. Ал карбамид тыңайтқышында керісінше, азот минералы топырақтың жоғарғы қабатында ұзақ сақталады, осының арқасында өсімдікке тиімді әрі тұрақты сіңіріледі.

Бүгіінде карбамид өндірісі бойынша жобаны «ҚазМұнайГаз» ҰК АҚ еншілес компаниясы «KMG PetroChem» ЖШС іске асыруда. Бұл жоба Ақтөбе облысы Мұғалжар ауданында Жаңажол газ өңдеу зауыты (ГӨЗ) негізінде жаңа кешен құруды көздейді. Күтілетін өндіріс қуаты жылына 1 млн тоннаға дейін.